അന്വേഷണത്തില്‍ ഇടപെട്ടിട്ടില്ലെന്ന് മുല്ലപ്പള്ളി രാമചന്ദ്രന്‍

വടകര: ടി.പി.ചന്ദ്രശേഖരന്റെ കൊലക്കേസ് അന്വേഷിക്കുന്ന സംഘത്തെ സ്വാധീനിക്കാനോ ഒരു തരത്തിലും കേസില്‍ ഇടപെടാനോ താന്‍ ശ്രമിച്ചിട്ടില്ലെന്ന് കേന്ദ്ര ആഭ്യന്തരസഹമന്ത്രി മുല്ലപ്പള്ളി രാമചന്ദ്രന്‍. താന്‍ ഏതെങ്കിലും തരത്തില്‍ കേസില്‍ ഇടപെട്ടുവെന്ന് ആരെങ്കിലും തെളിയിച്ചാല്‍ രാജി ഉള്‍പ്പെടെയുള്ള ഏത് പ്രായശ്ചിത്തത്തിനും തയ്യാറാണെന്നും മുല്ലപ്പള്ളി പ്രതികരിച്ചു.

കേസ് സി.ബി.ഐ. അന്വേഷണത്തിന് വിടുമോ എന്ന മാധ്യമപ്രവര്‍ത്തകരുടെ ചോദ്യത്തിന് കേസിന് ഗതിമാറ്റം സംഭവിച്ചാല്‍ അക്കാര്യം ആലോചിക്കേണ്ടിവരുമെന്നായിരുന്നു മുല്ലപ്പള്ളിയുടെ മറുപടി. മറ്റ് കേസുകളിലെ പോലെ പുറംചൊറിയല്‍ രാഷ്ട്രീയം ഈ കേസില്‍ ഉണ്ടാകില്ലെന്നും അദ്ദേഹം വ്യക്തമാക്കി.